Arşevê Oskan
Li seranserî Kurdistanê hunermendekî
wekî min tuneye..
Serpêhatiya Nr (8)
Ezê sûnd bixum, ku li seranserî
Kurdistanê hunermendekî wekî min jîr û deng xweş
tuneye, min dikarîbû bi seetan bistra û min nezanîbû
westandin çiye, hemû şahî
û seyranên buharê li welêt, li ber dengê min xweş
û geş dibûn, govendên ciwanan,
li ber dengê min pêl vedidan, xortan bi seetan li nîvê
govendê, ez ji ser milên xwe danedixistim, keçikan ne dihişt
deqeyekê jî zengilê telefona min raweste, ew keç
jî, hemû qîzên axa û begleran bûn, yekê ji ya din re
digot wir de here, ji çelengî û bedewiya xwe .
Agir
bikeve mala Xidirê kamireçî, ku çend
CD ji min re anîn û got : Temaşe
bike bê Seîd Gabarî û Selaho û Xidirkê Omerî çi
ecêb rakirine... hemû bûne milyonêr li Ewrupayê, her şevekê, bi hezaran euro qezenc dikin, ma tu
xweliya toza welêt li serê xwe û bavê xwe dike .
Bi
rastî dema ku min jî ew dîmen li salonên şahiyan
û li ser dika telefizyonên kurdan dîtin, mejî di serê min
de nema û gotina Xidiro bêhtir ket serê min, wekî guleya
ku tu bihilîne ser kab..... her şevekê bi hezaran euro,
yanî bi sed hezarên Surî û milyarên Tirkî....
Di
nevbera şev û rojekê de, min biryara xwe da, ku ez jî
xwe bighînim wan şahiyan, û ji wê tozê dûr
kevim, ez nabêjim çawa ez hatim .. lê min paseport
li ser masê wergirt, ez wan hunermendên ku li Ewrupayê dijîn,
dixim bêrîka xwe, her dawiya hefteyê dawetên min hene, yanî
mehiya min tenê ji dawtan, dighêje du hezar euro, ji bilî
pereyê sosyalê ku ji herçar
zarokên min û diya wan re derdikevin – Elhemdulila – lê
ez dikim û nakim pereyên min çênabin,
ji ber ku heyanî sibehê bê bavê xwedanê şahiyê
min serxweş dixin û ku dawiya şevê têm malê, bi erebeya xwe qezakê çê dikim, lewra ku name li dûv nameyê ji min re tên,
û karê min tuneye ku ez ceza şaşiyên xwe bidim...
Yahoo
çawa sed hezarên Şivan û Ciwan û Birader û Beytocan çêdibin
ez nizanim, lê wekî tê xuyanêkirin, ku ezê nikaribim li vî
welatî bijîm, çavê min lêye ku, wekî Bangîn
û Seîdo berê xwe bidim Kurdistana Iraqê... hema qe nebe
polîsên wir kurdin û min ceza nakin, lê ku li wir jî bi
min hisiyan ku ez heşîşê dikşînim...
vêca ezê berê xwe bi ku vekim .. ??!! .
tirej.com
