Wergerandin

 

 

 

 

Xelat Ehmed
Kolwaneyên Berbangê – Tiryak
Bercestekirin bo kurdî: Sebrî Silêvanî

 

 

Kolwaneyek din ji kolwaneyên berbangê:

Suwara asoyên berbest

waz li sehendiya nimûdar bihîne

bivegere û

seqayên bêsemyaniya min,

di reswabûna zeberdar de bibêzîne

bi hespayî,

ji benca havîbûnê birapere

navtenga min ya zirav ji ziraviya lûlavê

                       ya dûr ji dûriya seravê

dest lê bide û

xunçeyên min bi hêlma lêvên xwe bipeqîne.

Newroza yaran e

cestên ku di bin axê de nijandî, bigire, bidaqute

li ser bisirûdîne

û ez jî dê rondikên xwe bo rojgarek din bihêlim

di dîmenê dawiyê de li ser ekranê,

li ber çavên min,

hestiyên wan goştî digirin

                                         diaxivin

                                                       dadipirsin

evîndarên min in

û evîndarên min,

                           evîndarên te dimînin.

 

 

Di valayiya bê endaz de

hêvîdar in

û mizgîniya bêdengiyê,

şikestina awiriyan radigehîne

sînahiyê di çavên wan de divemirîne

bêcihî ye,

tinê agir cihê wan dike

agir:

za

                barî

          hat

                        çû

agir hemûyê disojîne :

zemîn

           esman

                       rêk

                              zeman

bi çirûskên lêvan hemûyê dadigirsîne,

agir..

hêvênî perwane nehêlan

kê du dest hene,

du bihostên agirî bo du kesan bivemirîne?

 

Û di navbera te û min de

pêngav tozxweliyê

geh digirin

geh dibarînin

dûr dimînin em û dûrî nêzîk e

em çi li vê dûriyê hemûyê bikin?

Hinavên me bo dîmanê

Diqerqiçin û hêj

tenê dayika min

di lorî lorî û dayê Menal de

dastana eşqa me ya berdar,

                                             dikare

                                                        bivegêre.

tirej.com