Dr. Mihemed Meşûq Xeznewî
Serokê Sûryê kir guhê gê
Qilçixa: Qado Şêrîn
Nizanim
çima dema min kir ko li ser Şêx Dr. Mihemed Meşûq
Xiznewî binivîsim du çîvanok hatin bîra min.
Dema em zarok bûn, dê û bavê me çîrok û çîvanok ji me re digotin,
em jî gelekî pê kêfxweş dibûn. Mexabin niha ew çîrok
û çîvanok nemane, ji ber televizyonan her tiştê xweş
bi xwe re bir.
Yek ji van çîvanokan: baran hat tertik hilya, ba hat qirşik firya,
hingî kêzê kenya kenya rovî tirtirka wê qetya.
Çîvanokeke din: çîrokê çîvanokê, xetxetokê, golka xalo çû pişt
malo, ne gur dixwe ne diz dibe..
Gelo girêdana çîvanoka yekemîn bi revandin û windakirina Şêx
Xiznewî re çiye?. Şêx Xiznewî ne tertikeke ko baran lê
hatibe û hiliyabe û ne jî qirşikeke ko li ber ba çûbe.
Lê ya diyar ji me hemûyan re ew merovekî wek meye û di nav
hovîtiya hêzên ewlekariya Sûryayê
de winda bûye.
Çîvanoka duyemîn diyar dike ko di dema berê de, dema ko Sûryayê wek
welat hîn ava nebibû aramî ji niha bêhtir hebû, çimkî
golik bi tenha xwe diçû pişt xaniyan, ne tebayên çola
wek gura ew dixwar û ne jî dizan ew didizî, û tirs ne ji
guran û ne jî ji dizan hebû.
Lê niha û di serdema desthilatdariya partiya Behs û hêzên ewlekariyên
hoviyane de, tirs ji her tiştî heye, kesek nema diwêre
mirîskeke xwe berde, gur û diz eşkere nêçîra xwe
dikin, gur û diz pir bûne, ji serokê dewletê ta bi piçûktirîn
karmend. Ên ko gerek aramiyê bînin welat û biparêzin bûne
diz û gur, îca di encama vê yekê de tirs û dizî pir dibe,
hêzên ko qaşo gerek milet ji tirs û dizan biparêzin
ew bûne gur û diz, milet ditirsînin û jixwe welat hemû
dizîne.
Aboriya welat hemû dizîn têr nebûn, bîr û boçûnên azad û demuqrat
hemû kuştin û şikandin dîsa têr nebûn, îca
dest bi revandin û nebedîkirina merovan kirin, merovên xwedî
helwestên mêrane, aboriya welat hemû revandin derve têr
nebûn, îca merovên wek Şêx Xeznewî revandin. Jixwe
bi revandina Şêx Xeznewî re tirs li ba her acinciyê Sûryê
peyda bû, kes nema diwêre bê Bodîgard û parêzvan ji mal
derkeve.
Di dema ko hun liv û tevgera çûk û mişkan li Sûryê dizanin, çilo
hun xwe ji revandin û nebedîkirina Şêx bêrî dikin?,
ma hovîtî ta vê radeyê, hun hovin ji we weyê her kes hov
e.
Di rûniştinekê bi serok êlên herêma cizîrê re, serokê Sûryê
ji wan re diyar kiribû ko haya wî ji revandin û nebedîkirina
Şêx Xeznewî nîne. Yekî ji serok eşîran nav di
xwe da û di nava xwe de got: Ma tu di guhê gê deye, dunya
li ser xerabûye tu hîn nizane hatiye girtin an na, ma tu çi
zane, tu çima serok e, ko tu mêr be va me ji te re got û de
wî serbest berde.
tirej.com
