Weşan

 

 

 

 

 

Ya ji sêvan û wêdetir
Pirtûkeke nû Ji Hoşeng Broka re derçû

 

Ji helbestên pirtûkê:

Ji bendemanê
û wêdetir, 
diçim te

Baran,

di pêjna xwîna te;

a fereh

wek sebra çiyan de,

mîna navê hatineke,

ji kewan heta bi kewan,

ku ba hînî aliyê pêncemîn bike,

hişîn tê.

 

Sibeh,

di pêjna bîra destên te;

yên ji baxên qehwê

û wexta xwendina kevokan de,

digihin.

 

Bîranîn,

ji hingûra ku ji destên te,

yên ji hatina şemamok,

giyakê sêvan,

kevok û xecxecokan, diweşe;

diçin quraftin û çinînê.

 

Heyv,

di çardehşeviya laşê te;

yê ji bîra genim,

yasemîn

û sirûdên, ku ji avê diçin avê de,

qert û kamil dibe

û kara stirandina pinpinîkên

lêvên te,

çemên sînga te

û xifşên bejna te dike.

 

Şev,

di pêjna bejna te de,

ku ji dîlokan diçe dîlokan,

li bîra xwe;

a ji gîhê,

axaftinên ji meyê

û laşên ku li tanê piştê vekirî,

mikur tê.

Û..... ez ,

di pêjna gulavê de,

ku nûbera memikên te ye,

gulava ku her endeko

bihna te distirîne;

û ez,

di pêjna awênê de,

awêneya ku bîra wê

duh,

îro

û sibê jî,

her berê nav û deng

û rengê te ye;

û ez,

di pêjna gavên babûnca

sînga te de;

di pêjna qebqeba qurmizê

lêvên te de;

û di pêjna keskê stirana mezin,

a navbera herdu dilên

min û te de,

dibim yarê

ji baranê heta bi baranê

û wêdetir;

dibim yarê ji destên sibehê,

ku pencereyan,

qehwe û qehwe,

haşt dikin,

heta bi destên sibehê

û wêdetir;

dibim yarê ji bîranînê

heta bi bîranînê

û wêdetir;

dibim yarê ji rûkê heyvê,

ku xwe dispêre kamilbûnê,

heta bi rûkê heyvê

û wêdetir;

dibim yarê ji derengî şevê,

ku diçe yaran,

heta bi derengî şevê

û wêdetir;

ûûûû...dibim yarê ji bendemanê,

ku tenê çaxê

navê te ye,

heta bi bendemanê

û wêdetir.

(R. 82-85)

*       *       *

Pirtûk ji Weşanên Pêrîye:

Çapa yekem

Sembol/ Avrêl 2005

Edîtor: Ahmet ÖNAL

Navê nivîskar: Hoşeng BROKA

Navê pirtûkê: Ya ji sêvan û wêdetir

ISBN: 975-9010-12-7

Tabloya bergê  pirtûkê: Mehmûd  HESSO

Dêzayna bergê û matîvên hundirê pirtûkê: Reşîd HESSO

Capxane û cîld: Kayhan Matbaasi

Weşanxana Pêrî

Sögütlü Çeşme Cad.

Pavlonya Sokak

Nuhoglu Apt. No: 10/19

Kadiköy/ ISTANBUL

Tel&Fax : +90 216 347 26 44

e-Mail: perikitap@nefel.com

*     *     *

Berhemên derçûyî:

- Mîtolojiya Êzdiyatiyê/ Lêkolîn (bi zimanê Erebî), Berlin, 1995.

- Bawişkandinin ji kopên minareyên razayî/ Helbest, Berlin, 1995.

-Serborekên çarşembên tozê/ Helbest, Stokholm, 1999.

- Hizra xwedawendiyê di têksta avestane de/ Lêkolîn, bi zimanê Elmanî(Di pirtûkeke hevbeş de, li gel komelek akadêmîsyên, nivîskar û  lêkolînerên Kurd û biyanî, ku ji weşanên înstîtûta Kurdî li Berlînê, li jêr navê „Dokumentation der Konferenz zu Avesta/21-22.11.2001“, Berlîn, 2002, hatiye weşandin. 

-Keskê dawî di cenazeya Xwedê de/ Helbest, Istanbol, 2002.

- Derengî bajêr, weha diniqutim nimêja navê te/Helbest,Istanbol, 2003.

- Êzdiyatî û seqayên domoziyane/ lêkolîn bi zimanê Erebî (di berhevokeke hevbeş de, bi dr. Xelîl Cindî re, li jêr navê “êzdiyatî, dîrok û seqayên wê ), Silêmanî, 2003.

tirej.com