Malpera Tîrêj Tevayî û çandî

Hoşeng Broka
Aliyê xwîna mezin

Ji aliyê xwîna dawî;

Kurdên dawî;

camiya îna dawî;

destên berberojkên

xatirxwestina dawî

û Qamişloka goristan

û hicrika

dawî re.

Ji xwîna kurt û kurmancî

û mezin re,

ku bi başûrê Xwedê bi ser ve diçe.

Ji sê milyon Qamişlo re,

ku bi adara xwîna tim li ba

tim li dar

û tim li kar,

pênc hezar hatina destên Helepçe;,

pênc hezar lisêdardana pencereyan,

kuştina keskesoran

û mirina hêlînan,

distirîn e.

Hêêêêêêê

Hêêê xwîna mezin,

xwîna ji bîra kewan,

pan,

dirêj

berbelav

û bersînor;

xwîna ji bîra Kurdên ne wexta xwe

û ne jî wexta Xwedê,

dirind e,

serhişk

û sergerdan;

xwîna ji bîra gulleyan,

zû,

bê westan,

bezok

û bê navber;

Xwîna ji bîra kîmyayê,

zîz,

Helepçan e

û têrnegirî,

Ku wexta wê , ya mezin û hey mezin,

komarên ji bîra sêdarên ebedê,

zindanên ebedê,

potînên ebedê,

peykerên tirsa

ebedê,

kabûsên ebedê,

û komarên ji bîra “ayetên Enfalên” ebedê;

ayetên ku her wexta “Allah û ekebr”

û her wexta mala Xwedê,

kuştar û kuştar,

kaniyên ku bi Kurdî sanahiya avê, digotin,

çiyayên ku bi Kurdî, bilind dibûn

û xwîna kovî haşt dikirin,

mijên ku bi Kurdî serê minareyên

wexta aliyên xerîb,

dixwerandin,

hicrikên ku bi Kurdî, yar

di bîra keska xwe de, bi hembêza

navên hev şa dikirin,

û destên ku bi Kurdî, çûyîna bjaran,

çûyîna goristanan,

çûyîna cejnan

û çûyîna yaran,

distiran,

di bîra ximava xwe de, heldiçnandin

û pêjna wan sernişîvî

aliyê ebeda nimêja xwe dikir in.

Hêêêêêêê

Hêêê xwîna mezin,

xwîna derengî navê Xwedê;

derengî destên ji bîra gîhê,

avê,

beybûnan,

û derengî

serhildanên baranê;

xwîna heta hetayê xwîn î,

heta hetayê “helal”,

heta hetayê berkew,

berkemîn,

beralî

û heta

hetayê

bermayîn

û

bergulle.

Hêêêêêêê

Hêêê xwîna bilind

Xwîna her kêlîk,

her nimêj;

her pêjna cejnan;

her pêjna pirtûkên zirmezin,

pêxemberên zirmezin,

serokên zirmezin,

aliyên zirmezin,

û sînoooooooooorên zirmezin.

Hêêêêêêê

Hêêê xwîna bi kurdî mezin û pir;

xwîna înên pir;

minareyên pir;

Xwedayên pir;

adarên pir;

birîna pir;

kîmyaya pir;

çûyîna pir

û xwîna

giriyê pir!!!

Ma ji navê te û wêdetir, hîn çend Xwedê hene,

ku em xwe yên wexta te/

û te ya çaxên kewan,

ji bîra îske-îskên wan biçin in ?

Ji pirê îna te û wêdetir, hîn çend hicrik hene,

ku em wexta wan

têr bêriya te,

bêriya hev

bêriya biserveçûna bi nermahiya êvarên

ji darbesta te,

bêriya kesera tekûz

a navbera herdu destên te,

û têr

bêriya giriyê wexta memikên

„Bûkên Barana“ te,

bikin?

Ji adarên wexta agirên derengî çiyan,

derengî têlan,

derengî maiynan

û derengî sînoran,

ku dihatin tewafa jana te û wêdetir;

ji kernevalên ji basa kuştina îna nimêja te û wêdetir;

û ji xwekuştina kemançeyên dîloka

çaxên sermemikan, piştî te

û wêdetir,

hîn çend bayên mezin hene,

ku em navê te,

wexta ku digihe,

li ber bejna wan a neqam,

bidêr in;

hîn çend navên mezin hene,

ku em çaxên rabûna wan,

çilmisandina sirûda te hilid in;

û hîn çend sirûdên mezin hene,

ku em çaxên te,

xwe, yên ku nagihin,

li bîra

gavên te

bîn in???

tirej.com